Psa 53 | DED | STEP | Yegecgareng yearu. Yegec yomoc maharatac sing masiki uba modacma heibesonga. Dawidingo yegec yofi heiec. Ngicngac negen ngentegecngina kpac, yeni herenginau yofi negemma deandae, “Anutu mong mi kecde, kpac yombong.” Yeni fakangina manganeu faka mangana yombong hania hania angkecma yenearunac mongngo faka gombunga mi anude.

Psalms 53

Yeni negen negengngina kpac

Yegecgareng yearu. Yegec yomoc maharatac sing masiki uba modacma heibesonga. Dawidingo yegec yofi heiec.

1 Ngicngac negen ngentegecngina kpac, yeni herenginau yofi negemma deandae, “Anutu mong mi kecde, kpac yombong.” Yeni fakangina manganeu faka mangana yombong hania hania angkecma yenearunac mongngo faka gombunga mi anude.

2 Anutungo kurumennunac kic fiu mau ngicngac yenengkecde. Ye ngicngac negen negentegecgoc kecma Anutu hofocandae, ngic ifia hofocyunuma kecde. 3 Yeni sasawango ine faka gombunga ngadehedacma fakangina manganedaru yenearunac mongngo mong faka gombunga mi angande, mocdong kpac.

4 Ngicngo yaka dzegoc neandae, yarengic yeni ifi isoc ngicngacfocna neyunuandae, yeni memeficac Anutu mi kpacgecde. Yeni negen negengtegecngina kpac. 5 Ngic ge gugecdeac kpedzucnegec yeni Antungo sicngina kpedzameude. Imocac wiac mong kengehagoc mi fingeru yeni ine kengectoa amma kpidohogecde. Anutungo wayunuecac gameyunuu nanggecde.

6 O, ebicfunac mesi mesi, imocngo Siong, imohacnac habeso, imocac yombong anemmede. Anutungo ngicngacfora mengereyunuu kekecngina ngereeude, imohai Yakoboac areng yeni sogaigecde nga Israeac areng yeni ubangerec negenggecde.